■睇呢位營銷個樣楚楚可憐咁，幾有吸引力。
呢間「 V2 Bar」係 11月開張嘅，客路以年輕人為主。嚟呢度相當方便，一出羅湖，跳上地鐵，搭去科學館站就到，就喺手機市場行前啲嘅「華聯大廈」對面。對於住新界北嘅朋友，過嚟呢邊玩，隨時仲快過出尖嘴，係咪？
DJ台前有舞池
■呢度有 7間包房，走廊都靚成咁，房間更加唔差啦！
呢間唔算大場──喺大陸嚟講吖嘛！但對於我呢啲香港人嚟講，一入去，大鄉里到嘩嘩聲！
「嘩，大過好多 MK吧仔啦！嘩，啲裝修乜豪到夜總會咁呀！嘩，包房都有 7間？遲啲仲會開多 10間？唔係吓嘛！嘩，呢條走廊咋？使唔使閃成咁呀！」以上係我採訪當日嘅即場反應，家諗起都自覺有啲失禮，但無計啦，一個人嘅成長環境係會影響個人視野嘅。我有無浮誇？請各位睇吓啲相啦！一大幅 LED牆，卡位梳化，簡單舒服；仲未計嗰個 DJ台，台前居然留咗個位做舞池，你話嘞，香港啲酒吧仔邊得嚟咁奢侈 o架！啲靚女喺度跳舞就至開心啦，而我哋睇嘅亦好開心！總之，大家 Happy啦！
■ DJ Booth前仲有位俾大家跳舞。
■傾心事？揀坐側邊卡座啦！
■大廳有好靚嘅 LED牆，又係型啫！
■ DJ大佬可文，幾有台型。
平酒水啱年輕客
■點形容呢？青春、高䠷、夠活力。
之但係，負責人話呢間場其實唔係玩豪華，而係走簡單青春路線喎。即係無論工作人員抑或客路都以年輕人為主，咦？啱晒我噃，尤其對住一眾靚女營銷，個個都青春無敵，飲酒都飲得暢快啲啦！
據 DJ兼主管可文話，呢度飲酒好抵，啤酒平均唔使 10蚊人仔一支；就算飲威士忌呢類大酒，都只係兩三嚿水有交易。點解做到個價咁抵？又係同一個原因囉，想吸引年輕一族嚟玩，多啲後生仔、後生女嚟撐場，成個場都充滿活力，良性循環，個場有生氣，自然又多啲青春無敵嘅靚仔靚女鍾意嚟，咁樣，啲酒賣平少少都係值得嘅。
■斯文怕醜嘅營銷，真係少見。
■呢間場連啤酒推廣小姐都好好玩。
V2 Bar
地址：深圳市福田區深南中路「統建辦公樓」 1樓
交通：地鐵科學館站， C出口，直行 3分鐘左右
酒水收費：啤酒¥ 110/打、¥ 65/半打，威士忌¥ 300/支、伏特加¥ 200/支、軟飲¥ 25/支
包房最低消費：小房¥ 300、大房¥ 600
特別節目：逢周六均有強勁派對