■呢位靚女經常都孖住位姊妹嚟睇騷！
呢間清吧，由羅湖打的過去約 20幾蚊人仔，細細間，但就好有特色，除咗有一啲藝術擺設、大堆文藝書籍之外，連舊式玩具都有。
而最大特色係以音樂主打，裝修力求簡單，昏黃燈光之下，特別好 Mood。每個星期，或者假期，一定有樂隊在場表演，大部份係深圳區獨立樂隊，唔好以為無料到，有啲已經有唱片公司幫佢哋出過碟，就算無碟出，都自有風格，仲有一班特定粉絲，好似「花倫樂隊」、「陸戰樂隊」等，喺暑假期間仲特登搞咗個本土樂隊系列，一連幾個星期搵嚟唔同嘅深圳樂隊做迷你演唱會，好似「集體樂隊」就係其中一隊深圳區本土樂隊，喺羅湖區樂迷心目中，特別係年輕樂迷，呢度係一個非一般嘅音樂站。
「執之原創樂隊」相當型仔，好似韓男一樣，所以好多女 Fans。
■呢兩位女士係音樂熱愛者，仲係呢間場長期粉絲。
■外國人都嚟睇樂隊演出，可知水準有番咁上下啦！
■成都「樹與顏色」樂隊，唱得非常肉緊。
樂迷聚腳點
除咗有國內樂隊，仲有好多外國樂隊，佢哋喺中國國內搞巡迴演出，穿州過省開幾十場演唱會，嚟到深圳，呢間酒吧係佢哋必然會開場嘅地點，你話呢間吧係咪好巴閉呢？無他嘅，因為外國樂隊都知道，呢間場全部客都對音樂有熱誠，仲係識貨之人，所以一年大大話話都有十幾廿隊呢啲外國樂隊喺度開演唱會，好似台灣獨立唱作人斑斑、「 The Kaleidoscope Arcade」等都嚟呢度表演，嚟緊嘅 27日晚都有隊由愛爾蘭加美國人嘅組合「 The Phoenix Prestige」開幾十場國內巡迴演唱會，喺深圳呢一站，梗係喺度唱番場啦！你話呢間場幾威水。
呢度咁受樂隊歡迎，除咗由於老細係一位好喜歡音樂嘅人，更因為呢度聚到一班好喜歡音樂嘅客人，閒來無表演都會喺度聚腳，有表演更唔使講，一定嚟呢度捧場啦！而且呢班粉絲入面，唔淨止得本土人，仲有好多唔同國籍嘅男女樂迷嚟呢度聽迷你演唱會，咁多人撐場，你哋話係咪超級有氣氛，超級好玩先？
即將演出：
The Phoenix Prestige China Tour 2010
The Phoenix Prestige樂隊由來自愛爾蘭和美國的三名成員組成。分別係來自美國嘅 Jay（鼓手）、愛爾蘭嘅 Brendan（吉他）同埋同樣嚟自愛爾蘭嘅主音兼 Bass John。佢哋喺中國工作同生活超過 5年，於國內上海西安等多個城市演出過，近期剛於中國完成一張新 EP《 The Bullet Catch》錄製與混音。
日期： 27/8（星期五）
時間： 21:00
門票：¥ 50、預售票¥ 40元
紅糖罐
地點：深圳市羅湖區黃貝路「樂揚楓景閣」一樓
酒水收費：啤酒¥ 25/支