■ Doris係宣傳部主管，搵佢就幫到你手。
呢間位於廣州越秀區嘅「 CK」，係新開嘅會所 Feel蒲點，單係睇個門口都知道唔小嘢，雖然唔算金碧輝煌，但比起裝潢華麗嘅場更好蒲，有種舒適自然嘅感覺，所以，客路斯文，特別受專業人士歡迎。雖然話係六月開張，但其實之前係一間酒吧，家陣轉走高檔路線，就更吸引一眾高檔客人。
氣氛夠 Relax
■好有女人味嘅歌手。
每間場都希望啲客人入到嚟，有一種流連忘返，或者依依不捨嘅感覺，呢間場就做得到，以獨特設計，加上柔和燈光打造出休閒氣氛，加上嚟呢度啲客人身份階層都係有啲水平，斯文而不浮誇，所以，吸引到好多女仔嚟玩，譬如斯文大方嘅 OL啦，程風仲遇到相識嘅兩位車模，佢哋剛剛喺華南區做完車展，夜晚落嚟飲酒消遣，貪呢度氣氛夠 Relax喎！兩位車模仲帶咗幾位姊妹過嚟一齊玩，真係睇到程風未飲先醉，梗係啦！除咗呢班車模，場內更有好多女客飲酒，堪稱新世代嘅女士集中地。
■佢唱歌，把聲好有磁性，直情可以去參加「超級巨聲」。
■其中一位客人，斯文大學生，仲係語言天才，識幾種語言。
飲酒聽歌嘆世界
呢間場絕無啲起勢猜枚嘅嘈雜聲，取而代之就係甜美而悅耳嘅歌聲。兩位駐場歌手唱歌又真係幾好聽，無論個人獨唱又或者係二人合唱，佢哋都唔會唱粵語同國語歌，主打英文歌，兩位唱得好有水準嘅歌手既唱 Light Music，亦會唱吓啲 Sofa Music，坐喺卡座邊飲酒邊聽歌，老套啲都要講句：真係人生一大樂事，嗰種悠然自得，嗰種輕鬆自在嘅感覺，舒服到你唔想走啦！
另外，對於喜愛杯中物嘅朋友，呢間場亦係嘆酒勝地。門口個酒窖放滿來自不同國家，傳統或新世界嘅紅白酒，俾客人挑選。若然唔喜歡紅白酒，不妨試試單一麥芽威士忌，好似識飲之人都鍾意嘅 Macallan，仲有一隻味道一流，後續性不俗嘅 Benriach，包你試過都話正！咦！講吓講吓，坐吓坐吓，又到凌晨一點幾，唔緊要啦！呢一轉，歌手唱爵士樂， Good！ I like it！
■無歌聲都有 DJ哥哥打碟，爵士樂曲就至多啦！
■會所式嘅歌手演繹，感覺舒服又好 Feel。
■想嘆吓，呢度有大量紅、白酒供應。
■閒日都坐滿，雖不至人山人海，但係咁就啱啱好啦！
CK
地址：廣州市越秀區北京南路「新光商務大廈」 2-3樓
酒水收費：
單一麥芽威士忌推介
Benriach¥ 570/瓶、 Macallan¥ 750/瓶
紅白酒推介
Lavina（ Red Wine）¥ 120/瓶、 Lavina（ White Win）¥ 120/瓶
Plus¥ 49開瓶費
現場節目
星期一、四、六 Live Music
星期三 Salsa Night