■呢位熟客話好鍾意影相，所以唔介意我影。
香港 OL放咗工，多數蒲尖嘴、老銅，無他嘅，原因不外乎就腳同埋間場好玩；而深圳福田區嘅 OL亦一樣，佢哋收工想飲杯嘢，唔通搭一輪車去搵地方蒲咁攰咩，近近哋購物公園都大把酒吧啦，好似呢間「 Q Club」，場新就腳又企理，乃係 OL新近嘅蒲點。
呢度除咗交通方便，好氣氛係受歡迎另一主因。每個星期起碼有五晚都好多人喺度飲嘢，既有室內地方，又有室外燭光座位，把酒言歡夠晒情調。而且正值秋凉，坐露天位就更 Fit。駐場打碟有一位 Cool Man鬼仔 DJ，型仔得嚟，手碟都幾 OK o架！
室內跳到室外
不過，程風對仔無興趣，都係講番啲靚女開心啲。呢度除咗有好多 OL之外，仲有兩位駐場 Dancer，所謂貴精不貴多，兩個都好專業，佢哋會喺室內同室外嘅跳舞位表演，室內位置喺 DJ Booth前面，室外就設喺啲矮枱邊，客人可以一邊飲酒，一邊近距離欣賞 Dancer美妙又性感嘅舞姿，真係爽爆。
Clubbing Feel嘅場同一般營銷場係有啲唔同嘅，就算係 Dancer跳舞，都係跳得好有格調，好似其中一位 Dancer Cindy，就專跳 Disco Jazz，即係點？程風係舞林門外漢，都係各位自己去欣賞啦！
此外，呢間場設有兩間有氣派又設計簡約嘅包房，啲靚女客人最喜歡入呢啲房飲酒傾偈，好 Feel得嚟又夠私隱。
■ Cindy係一名好專業嘅 Dancer。
■開心果成個陳敏之咁都幾 OK啦！
音樂帶動氣氛
■鬼仔 DJ，手碟打得，個樣又睇得，應該有唔少女粉絲。
呢間場最大特色就係不設營銷，完全以音樂帶動氣氛，呢點亦係吸引斯文 OL嚟玩嘅重要元素。你知啦，啲靚女放咗工都想 Relax吓，若然去營銷場，佢哋真係唔多啱，反而嚟呢度，有正嘅音樂，往往就忍唔住會走出去舞台跳吓舞。如是者，良性循環，有靚女，自然又吸引到男士嚟玩啦！所以，雖然場仔細細，一樣搞得熱熱鬧鬧，有聲有色。
聲方面係音樂，色方面除咗靚女多之外，燈光設計獨特，睇得出係花過心思 o架，最重要係配合音樂節奏同整體氣氛。
至於酒水價就大路嗰隻啦，四嚿幾有威士忌連軟飲，程風特別推介各位飲吓生啤，成班人飲 3 Litre，均除番，隨時幾條草就蒲一晚 o架啦！
■呢度個場仔唔算大，但人氣夠兼且燈光效果不俗。
■唔好睇呢度地方細細，呢度都有兩間包房畀人客玩。
Q Club
地址：深圳市福田區「購物公園」北園 B區 138號
交通：地鐵「購物公園」站， B出口，由商場出即見
酒水收費：啤酒¥ 20起/支、生啤¥ 30起/Pint，¥ 150/3 Litre、軟飲¥ 20/支、威士忌¥ 480/套、龍舌蘭¥ 460/套（各配送 6支軟飲）