■客人都幾得，咁先至好玩。
呢間就係「帕絲酒吧」（ Bar Plush），場唔大，但咁先至有氣氛，而且呢度特登搵咗之前喺福田好出名嘅前「 Laluno Club」（雖然間吧已結束咗，但真係好勁。）音響迴音設計師嚟設計音響效果，梗係唔同啦！呢間場最多玩就係 Hip Hop，算係呢度主打 Music，平日 Happy Hour啤酒 10蚊人仔一支，肯定抵飲啦！
閣下早段嚟坐就夠晒舒服，夜段當然啱晒鍾意聽歌玩派對嘅朋友啦！此外，咪以為場細就無靚女，呢度都有幾位營銷 o架，其中一位仲係業餘平面模特兒「晶晶」，我覺得佢係「圓面版 GiGi」，經常笑容滿面，見到都開心。
■ DJ Cook相當有型，而且仲打得幾好 Feel。
■呢度有位女 DJ Electra，幾性感！
派對精采爆晒場
程風嚟得呢度梗係貪佢哋好好玩，呢晚就有個名為「 Frontline Event」嘅哌對，梗係嚟睇睇啦！
話明係玩 Sexy Funk，除咗玩 Funk之外，唔同嘅 DJ有唔同法寶，好似打頭陣幾型仔嘅 DJ Cook，先打吓 Groovy 70's同埋 80's Funk；跟住來自香港嘅性感女 DJ Electra，打佢嘅拿手好戲 Sexy Club Mixes。啲女客聽到，興奮到出晒嚟跳舞，晒身材、晒舞姿，跳到上台，你話幾 High。押尾仲有 DJ Curtain，梗係打佢至愛嘅 Progressive Dance Tunes；幾位 DJ仲有打啲 Electro House等等不同類型。勢估唔到呢間場，場仔細細，打啲歌仔真係幾得，咁精采嘅派對梗係爆晒場啦！
■跳到上舞台就知道有幾好玩啦！
■晶晶係呢度嘅營銷，有水準啩？
新一代深圳老蘭
講真，家「購物公園」北園呢邊嘅酒吧街，已經超越咗對面嘅「 Co Co Park」酒吧街，嗰邊係傾偈吹水兼飲酒，但係北園直情好似全盛期老蘭咁，尤其係星期五、六，條路旺到都差啲行唔到，啲客人有國內 OL、港客兼外籍男女，仲唔係新一代深圳蘭桂坊咩？而呢間場都一樣有好多女客捧場，特別係佢哋玩開派對；唔好以為一玩派對就多外籍人士，係就係多啲，但係一樣唔少國內 OL嚟玩，所以下次呢度有派對，千祈咪錯過嘞。
■原來呢個場，玩得癲嘅係班女士。
■個場係細啲，但係都幾好氣氛。
帕絲酒吧 Bar Plush
地址：深圳市福田區「購物公園」北園 C座 148號
酒水收費： Happy Hour 18:00-22:00
啤酒¥ 10/支；洋酒套餐¥ 886（ 2支洋酒、 8支軟飲、 2份任選小食、 1份水果）；特價 Cocktail¥ 15/杯起